«У яго пыталіся, ці паведамляць пра затрыманьне амбасадзе. Ён адказаў адмоўна, аднак пасьля даведаўся ад сваякоў, што яго адмова была праігнараваная. У курсе і амбасада, і МУС Беларусі, куды тэлефанавалі сваякі даведацца, ці не ўводзілася яму забарона на выезд. Там параілі зьвяртацца ў амбасаду для вырашэньня пытаньня аб вяртаньні на радзіму», — сказаў праваабаронца.
Кісьляк, паводле яго слоў, увечары 25 ліпеня накіраваў заяву ў Генэральную пракуратуру Грузіі, у якой апісвае гэтую сытуацыю. Акрамя таго, ён зьвяртае ўвагу на тое, што ў затрыманьні беларуса браў удзел супрацоўнік дэпартамэнта, які перад гэтым «паглядзеў на яго і на ягоную заяву».
Як паведамляў «Позірк», 14 ліпеня беларус (імя рэдакцыі вядома, пакуль не публікуецца па меркаваньнях бясьпекі) прыйшоў у дэпартамэнт з заявай аб наданьні прытулку. Спачатку заяву прынялі, затым вярнулі, а самога падаўца затрымалі і зьмясьцілі ў ізалятар пры дэпартамэнце. З прычыны заканчэньня тэрміну дзеяньня беларускага пашпарта (яшчэ ў 2020 годзе) беларус не абнуляў кароткачасовымі выездамі (т. зв. візаран) дазволены тэрмін бесьперапыннага знаходжаньня ў Грузіі (365 дзён) і знаходзіўся ў краіне нелегальна. Мяняць пашпарт у беларускім дыппрадстаўніцтве (да ўказа Аляксандра Лукашэнкі ад 4 верасьня 2023 года гэта было магчыма) ён баяўся праз пагрозу перасьледу. Як заявіла ў інтэрв’ю «Медыязоне» дзяўчына арыштаванага, яго пачалі шукаць беларускія сілавікі «з-за рэпостаў з „экстрэмісцкіх“ рэсурсаў». У Грузіі грамадзянін Беларусі пражывае з 2016 года і да 2020-га, паводле слоў дзяўчыны, езьдзіў на радзіму.
15 ліпеня Тбіліскі гарадзкі суд пастанавіў арыштаваць затрыманага на тры месяцы. Паводле слоў Кісьляка, у суд не ўдалося перадаць дакумэнты для абароны беларуса, у тым ліку перакладзеныя на грузінскую мову даклад Камітэта ААН супраць катаваньняў і апошнюю справаздачу спэцыяльнага дакладчыка ААН па Беларусі Анаіс Марэн (у кастрычніку 2024 года яе зьмяніў Нілс Муйжніекс). З нагоды гэтага праваабаронца падаў заяву ў Генэральную пракуратуру«.
Аднак затым заяву аб наданьні прытулку ўдалося падаць і зарэгістраваць, адбылося першае з двух прадугледжаных інтэрв’ю. «Паводле мясцовых законаў спатрэбілася пацьвярджэньне судом яго арышту ў статусе просьбіта прытулку», — патлумачыў Кісьляк.
Паводле слоў праваабаронцы, 18 ліпеня арыштаваны быў дастаўлены ў суд, яго інтарэсы прадстаўлялі два нанятыя адвакаты. Суд прыняў рашэньне вызваліць беларуса, абавязаўшы адзначацца ў Дэпартамэнце міграцыі МУС два разы на тыдзень.
Грузінскія ўлады адхіляюць усе заявы беларусаў аб прадастаўленьні прытулку. Кіроўная партыя «Грузінская мара» прарасейскага алігарха Бідзіны (Барыса) Іванішвілі пайшла на канфрантацыю з Эўразьвязам і ЗША, прызнае рэжым Лукашэнкі. Абраны аднапартыйным (апазыцыя адмовілася ўвайсьці) парлямэнтам прэзыдэнт Міхаіл Кавелашвілі павіншаваў таго з «пераабраньнем». Мэтады барацьбы з апазыцыяй усё больш нагадваюць беларускія.
Сам Кісьляк 11 ліпеня атрымаў канчатковую адмову ў прытулку, прайшоўшы за некалькі гадоў усе мясцовыя інстанцыі. Цягам 30 дзён ён абавязаны пакінуць Грузію. «Але куды выяжджаць, калі пашпарт скончыўся? У гэтай сытуацыі ў мяне адна дарога — у Беларусь. Тут шмат пытаньняў», — заявіў «Позірку» праваабаронца.
Кісьляк мае намер абскардзіць рашэньне мясцовых уладаў у структурах ААН.
У Грузіі цяпер пражывае каля 12 тыс. беларусаў, якія эмігравалі з-за пагрозы рэпрэсій. Іх колькасьць паступова памяншаецца.
Форум